apmsanantapur

ఐక్యూ అసలు కథ!

బ్రిటన్‌లో ఓ బాలిక.. మేధస్సులో ఐన్‌స్టీన్‌, బిల్‌ గేట్స్‌, స్టీఫెన్‌ హాకింగ్‌ వంటి ప్రముఖులను మించిపోయింది. వారి ఐక్యూ స్థాయి 160 అయితే ఈ బాలికది 162. అసలు ఈ ఐక్యూకీ మేధస్సుకి ఏంటి సంబంధం. ఐక్యూ ఎక్కువగా ఉంటే మేధావులేనా! అసలు దీన్ని ఎలా లెక్కిస్తారు! ఇంతకీ ఐన్‌స్టీన్‌ ఐక్యూను ఎలా లెక్కగట్టారు!

నా ఐక్యూ 145: ఐన్‌స్టీన్‌ మీరు చదువుతోంది నిజమే. ఐన్‌స్టీన్‌ స్వయంగా తన మేధోస్థాయిపై చేసిన వ్యాఖ్య ఇది. ఆయన బతికున్నపుడు ఒక చిన్నారి ఆయన ఐక్యూ స్థాయిని తెలుసుకోవాలని.. ఆయనకు ఒక లేఖ పంపిందట. దానికి స్పందించిన ఐన్‌స్టీన్‌ ఆ చిన్నారికి సమాధానం పంపుతూ తన ఐక్యూ 145 అని చెప్పారట.

ప్రస్తుతం ప్రపంచ వ్యాప్తంగా పలు సంస్థలు విద్యార్థులు, యువత ఐక్యూను పరీక్షించి.. దాన్ని ప్రముఖుల ఐక్యూతో పోల్చుతున్నాయి. ఐన్‌స్టీన్‌ వంటి ప్రముఖులకన్నా ఎక్కువగా ఐక్యూ ఉన్న విద్యార్థులు.. ఏటా పదుల సంఖ్యలో వెలుగులోకి వస్తున్నారు. దీంతో ఐక్యూ పరీక్షలపై ఆసక్తి పెరిగింది. ప్రస్తుతం వ్యక్తులకు పలు పరీక్షలు నిర్వహించి వారి ఐక్యూను కొన్ని గంటల్లో తేల్చేస్తున్నారు. ఇది అందరికీ తెలిసిందే. అయితే ఇప్పుడు లేని.. చనిపోయిన ప్రముఖుల ఐక్యూలను ఎలా లెక్కగట్టారన్నది మరింత ఆసక్తికర అంశం. ఇప్పుడు లేని వారి ఐక్యూను లెక్కగట్టడానికి మాత్రం చాలా సమయం పడుతోంది. ఆయా ప్రముఖుల కాలం.. అప్పుడు వారు చేసిన చర్యలు, సాధించిన విజయాలు.. విజయాలు సాధించినపుడు వారి వయసు, రచనలు, చిత్రాలు, ప్రతిపాదించిన సిద్ధాంతాల ఆధారంగా మానసిక శాస్త్రవేత్తలు వారి ఐక్యూను లెక్కగట్టారు. లియో నార్డో డావిన్సీకి 220, న్యూటన్‌కి 190, డార్విన్‌కి 165, ఐన్‌స్టీన్‌కి 160 ఉన్నట్లు తేల్చారు. అయితే ఈ గణాంకాలు వూహాజనితమే తప్ప.. అవి పక్కాగా లేవన్నది మరికొందరి వాదన. అలాగే ప్రస్తుతం నిర్వహిస్తున్న ఐక్యూ పరీక్షలపై కూడా పలువురు నిపుణులు అభ్యంతరం వ్యక్తం చేస్తున్నారు. కేవలం ఒక్క పరీక్షతోనే ఒక్క వ్యక్తి ప్రజ్ఞను అంచనా వేయలేమని.. అందుకు కనీసం మూడు రకాల పరీక్షలు అవసరమని ది టెలిగ్రాఫ్‌, న్యూ సైంటిస్ట్‌ పత్రికలు ఆధ్వర్యంలో నిర్వహించిన అధ్యయనంలో వెల్లడైంది.

ఆ పరీక్ష ఇలా మొదలైంది..!

ఐక్యూ గణన 19వ శతాబ్దంలో మొదలైంది. శారీరక కారణాల వల్లే మానసిక విలక్షణత సాధ్యమవుతుందని భావించిన ప్రముఖ శాస్త్రవేత్త, మానసికనిపుణుడైన ఫ్రాన్సిస్‌ గాల్టన్‌ తన వాదనను నిరూపించేందుకు అధ్యయనం ప్రారంభించారు. ఈ నేపథ్యంలో 1890లో గాల్టన్‌ శిష్యుడైన అమెరికన్‌ జేమ్స్‌ మెక్‌ కీన్‌ కాటెల్‌ మేధస్సును కొలిచేందుకు ఒక పరీక్ష నిర్వహించాలన్న ఆలోచనను తెరపైకి తెచ్చారు.

అదే సమయంలో ఫ్రాన్స్‌లో అక్కడి ప్రభుత్వం చిన్నారుల్లో మేధస్సును కొలిచేందుకు ఒక విధానాన్ని సృష్టించాలని భావించి.. ఆ పనిని ఆల్‌ఫ్రెడ్‌ బినెట్‌ అనే మానసిక నిపుణుడికి అప్పగించింది. ఆయన తన వద్ద ఉన్న సమాచారం, నైపుణ్యం ఆధారంగా ఒక పరీక్ష విధానాన్ని రూపొందించారు. తర్వాత 1912లో జెర్మన్‌ సైకాలజిస్టు విల్‌హెల్మ్‌ స్టెర్న్‌ చిన్నారుల్లో మానసిక వయసు గుర్తించే ప్రతిపాదన తెచ్చారు. మానసిక వయసును, అసలు వయసుతో పోల్చి మేధస్సును లెక్కించే విధానాన్ని రూపొందించారు. దీన్ని 1916 నుంచి అమెరికా అమలు చేయడం ప్రారంభించింది. చివరకు ఈ పరీక్ష ఆధారంగా హత్యకేసులో శిక్షపడిన ఖైదీని సైతం అతని మానసిక స్థితి సరిగ్గాలేదని తేల్చి వదలిపెట్టింది.

మొదటి ప్రపంచ యుద్ధంలో..

1917లో మొదటి ప్రపంచ యుద్ధంలో పాల్గొనేందుకు అమెరికా సిద్ధమైనపుడు సైన్యంలోని పలు ఉద్యోగాలకు అవసరానికన్నా ఎక్కువ మంది నుంచి దరఖాస్తులు వచ్చాయి. వారిలో సమర్థవంతులను ఎంపిక చేసేందుకు అమెరికా.. ఐక్యూ అనేపదాన్ని సృష్టించిన లాయీస్‌ టెర్మాన్‌ సహా ఏడుగురు మానసిక నిపుణుల కమిటీని నియమించింది. ఈ కమిటీ పలువురికి ఐక్యూ పరీక్షలు నిర్వహించి వాటి ఆధారంగా ఉద్యోగులను ఎంపిక చేసింది. 1919కి దాదాపు 20 లక్షల అమెరికన్లకు ఈ ఐక్యూ పరీక్ష నిర్వహించారు. తర్వాత పలు సంస్థలు, పాఠశాలల్లో ఈ పరీక్షలు మొదలయ్యాయి. ప్రస్తుతం ప్రపంచ వ్యాప్తంగా అన్ని పరీక్షల్లోనూ ఐక్యూ గణన సాధారణమైపోయింది. ప్రస్తుతం పాఠశాలలు, విద్యార్థులకు సిలబస్‌ తయారీలో ఈ ఐక్యూ పాత్ర కీలకంగా ఉంటోంది.

మానసిక వయసు అనేది ఆ వ్యక్తి ప్రతిభ ఆధారంగా గణిస్తారు. ఓ నాలుగేళ్ల చిన్నారి ఆలోచనా తీరు, ప్రతిభ ఆరేళ్ల చిన్నారికి సమానంగా ఉందనుకుంటే.. ఆ చిన్నారి మానసిక వయసు ఆరేళ్లన్నమాట. ఇలా మానసిక నిపుణులు ఒక వ్యక్తికి ఏ వయసులో ఎంత ప్రతిభ, పరిజ్ఞానం ఉంటుందని ఎప్పుడో గణించారు. దాని ఆధారంగా చిన్నారుల ప్రతిభను వారికన్నా ఇతర వయసుల వారితో పోల్చి ఐక్యూని లెక్కిస్తారు. ఇందుకోసం ఆయా వయసుల వారికి తగినట్లు భాష, నైపుణ్యాలు, విచక్షణ, ఆలోచనా తీరు, సమయస్ఫూర్తి, నేర్పరితనం, జ్ఞాపకశక్తి వంటి పలు అంశాలకు సంబంధించిన ప్రశ్నలు, సమస్యలతో పరీక్ష నిర్వహిస్తారు. ఆరేళ్ల చిన్నారికి ఇచ్చిన సమస్యలను నాలుగేళ్ల చిన్నారి పరీక్షించిందంటే ఆ చిన్నారి ఐక్యూ స్థాయి 6/4X100= 150 అన్నమాట.

ఎవరికి ఎంత ఉంటుంది!
సాధారణంగా ప్రతి ఒక్కరికీ ఐక్యూ స్థాయి 110-90 ఉండాలి. అంటే ఏ వయసుకు అంత పరిజ్ఞానం ఉండాలన్నమాట. ఒకవేళ 140 కన్నా ఎక్కువగా ఉంటే అతను గొప్ప మేధస్సును కలిగినట్లు లెక్క. 111 నుంచి 139 మధ్య ఉంటే ప్రతిభావంతుడు. 90కన్నా తక్కువగా ఉంటే అతనికి మేధస్సు తక్కువగా ఉన్నట్లే లెక్క. సాధారణంగా ఒత్తిడిలో ఉన్నవారికి ఈ స్థాయి ఉంటుంది. మానసిక సమస్యలున్నవారికి 70 కన్నా తక్కువగా ఉంటుంది.